លើកុមារ

អំពើហិង្សាលើកុមារកើតមាន នៅគ្រប់ប្រទេសទាំងអស់នៅក្នុងពិភពលោក គ្រប់វប្បធម៌ វណ្ណៈ និងជាតិសាសន៍។

ប្រទេសកម្ពុជាមិនខុសពីប្រទេសទាំងអស់នោះដែរ នេះបើតាមការអង្កេតស្ដីពីអំពើហិង្សាលើកុមារនៅក្នុងប្រទេសកម្ពុជា (CVACS) កាលពីឆ្នាំ ២០១៣ បានបង្ហាញថា ជាងពាក់កណ្ដាលនៃកុមារ ធ្លាប់ទទួលរងអំពើហិង្សាយ៉ាងហោចណាស់មួយទម្រង់មុនពេលពួកគេអាយុ១៨ឆ្នាំ។ អំពើហិង្សា រួមមាន ការទះកំផ្លៀង ច្រាន ក្ដិច ទាត់ធាក់ វាយនឹងរំពាត់ ឬវាយនឹងវត្ថុអ្វីម្យ៉ាង។ អ្នកប្រព្រឹត្តបានប្រើប្រាស់អាវុធ ឬគំរាមប្រើប្រាស់អាវុធ ហើយការរំលោភបំពាន មានទាំងការរំលោភបំពានផ្លូវកាយ និងផ្លូវភេទរហូតដល់ការរំលោភបំពានផ្លូវចិត្ត។

អំពើហិង្សាក្នុងវ័យកុមារភាព ប៉ះពាល់ដល់ការអភិវឌ្ឍ និងការលូតលាស់របស់កុមារយ៉ាងខ្លាំង និងជះឥទ្ធិពលជាអវិជ្ជមានរហូតដល់ពេញវ័យ និងប៉ះពាល់ពេញមួយជីវិតរបស់បុគ្គលនោះ។ គេបានដឹងថា បុគ្គលដែលធ្លាប់ជាជនរងគ្រោះនៃអំពើហិង្សាកាលពីវ័យកុមារ និងបុគ្គលដែលធ្លាប់បានឃើញអំពើហិង្សា ប្រឈមនឹងគ្រោះថ្នាក់ដល់សុខភាពផ្លូវកាយ និងផ្លូវចិត្ត ច្រើនតែរៀនមិនបានខ្ពង់ខ្ពស់ និងលទ្ធភាពទទួលបានការងារក៏មានកម្រិត ហើយនៅពេលក្រោយមកក្នុងជីវិតរបស់ពួកគេ ពោលគឺពេលពួកគេធំឡើង ពួកគេតែងតែធ្វើតា្រប់ឡើងវិញ ប្រព្រឹត្តនូវអំពើហិង្សា និងបង្កគ្រោះថ្នាក់ផ្សេងៗ។

អំពើហិង្សាលើកុមារ ក៏មានផលវិបាកផ្នែកសេដ្ឋកិច្ចដ៏គួឲ្យកត់សម្គាល់ផងដែរ។ ការសិក្សាក្នុង​ឆ្នាំ​២០១៣ ដែលមានចំណងជើងថា “បន្ទុកសេដ្ឋកិច្ចនៃផលវិបាកផ្នែកសុខភាពបង្កឡើងដោយអំពើហិង្សាលើកុមារក្នុងប្រទេសកម្ពុជា” បានប៉ាន់ប្រមាណថា អំពើហិង្សាលើកុមារបង្កឱ្យប្រទេសខាតបង់ថវិកាចំនួន ១៦៨ លានដុល្លារអាមេរិក ស្មើនឹង ១,១ ភាគរយនៃផលិតផលសរុបក្នុងស្រុក (GDP) របស់ខ្លួន។

ចាប់តាំងពីការផ្សាយរបាយការណ៍ CVACS ក្នុងឆ្នាំ ២០១៣ រដ្ឋាភិបាលកម្ពុជា និង អង្គការមិនមែនរដ្ឋាភិបាល បានបង្កើនការគំនិតផ្ដួចផ្ដើម ដើម្បីការពារកុមារឱ្យកាន់តែល្អប្រសើរ។ ការកសាងផែនការសកម្មភាពដើម្បីទប់ស្កាត់ និងឆ្លើយតបចំពោះអំពើហិង្សាលើកុមារ (២០១៧ – ២០២១) គឺជាការផ្ដួចផ្ដើមគំនិតមួយក្នុងចំណោមការផ្ដួចផ្ដើមគំនិតនានា។ របាយការណ៍ CVACS បានផ្ដល់ភស្តុតាងស្ដីអំពីអត្រាប្រេវ៉ាឡង់ និងទំហំនៃអំពើហិង្សាផ្លូវកាយ ផ្លូវចិត្ត និងផ្លូវភេទ ដែលកុមារជួបប្រទះក្នុងប្រទេសកម្ពុជា ហើយផែនការសកម្មភាពបានលើកឡើងអំពីសកម្មភាព ដែលត្រូវអនុវត្តដោយក្រសួងស្ថាប័នរបស់រាជរដ្ឋាភិបាល និងអង្គការមិនមែនរដ្ឋាភិបាល។ ផែនការសកម្មភាពនេះ គ្របដណ្ដប់លើវិស័យសំខាន់ៗ នៃការអន្តរាគមន៍ក្នុងផ្នែកសុខាភិបាល សុខុមាលភាពសង្គម អប់រំ និងយុត្តិធម៌ក្នុងសង្គម។

យុទ្ធសាស្ត្រ Cambodia PROTECT នឹងអប់រំសង្គមទាំងមូល អំពីហានិភ័យ របៀបបង្ការ និង ឆ្លើយតបចំពោះអំពើហិង្សាលើកុមារ ប្រសិនបើពួកគេឃើញអំពើហិង្សាកើតឡើង ឬសង្ស័យថា អំពើហិង្សាកើតឡើង។ យុទ្ធសាស្រ្តនេះ ក៏លើកកម្ពស់ការយល់ដឹង និងការផ្ដល់ការណែនាំប្រជាជនឲ្យបានដឹងអំពីរបៀបនៃការបង្ការ និងឆ្លើយតបចំពោះ​ការបំបែកកុមារពីគ្រួសារដោយមិនចាំបាច់។